2020 HBC Carson Sunday Caanhmannak (Video)




2020 HBC Carson Sunday Caanhmannak (Video)

===================

Baptist Buhlun Khrihfabu nih cun Carson hi Thlarau lei in a kan hringtu an si caah Pathian changtu tluk in an upat hna. Cucaah Upat phu an si tiah upat peknak ni (Hakha an phak nicaan he aa naih bik zarh) cu Carson Sunday tian caan hman a si. Atu hi HBC caanhmannak a si i HBA nih caan an hman. Thawhlawm zong Carson Hall le Missionary pawl thlam remhnak ah tiah HBA ah pek dih a si. Caanhmannak rak i hrawm ve.

A tang ca i Pastor Van Tling Thang nih Carson te nupa tuanbia a ṭialmi ka thil chih. Upat pek an tlak ko na ti ve maw? Pumhnak caan hmannak pawl Video cu ca i a tanglei ah ka chiah hna. Solo: Mercy, Rachel… Thawngthachim Rev. Stephen Soe Paing (HBA AGS) hna an si.

Carson Siangbawipa le Siangbawinu Tuanbia Tawi
#########################

2020 March 15 cu HBA ramchung dihlak Carson Sunday ti in caanhman a si lai. Pathian sinah lunglawmhnak chim buin le siangbawite nih Laimi an kan dawtnak ruat buin….

August 6, 1860 kum ah Iowa khua ah a chuak. June 1883 kum ah Nebraska Baptist Seminary in a awng i June 1886 ah Shurtleff College in B.D. a awng. Fidelity ah Baptist Pastor si dingin August 29, 1885 ah dotlaknak (ordination) an pek.

Image may contain: 2 people, people standing

American Baptist Missionary Union nih April 6, 1886 ah Kawlram ah siangbawi rianṭuan an fial. A ttuannak ding hmun cu Kawlram thlanglei deuh Prome hrawngah a ummi Laimi sinah a si. October 14, 1886ah Kawlram kal ah aa thawh i December 13, 1886 ah Rangoon a phan. Laura Hardin he December 18, 1886 ah Bassein khua ah an i um. An i tthitumh dih cangka in Rev. Carson le Laura Carson cu Henzada ah an kal. Zarhpi ni an hman hmasabik ah Rev. Carson nih minung 13 tipil a pek hna. Thla 3 an um hnu ah Henzada in Prome ah an i ṭhial. Prome ah kum 2 an um hnu ah Thayetmyo ah kum 11 an um.

Rawn Chinmi sinah kum 13 rian an ttuan hnu ah Laitlang Hakha ah an i ṭhial. February 2, 1899 in Thayetmyo in an i thawh i March 15, 1899 ah Hakha an phan.

Rev. Carson Rianuannak

Hakha bawi Lian Mo ram ekka 30 cu Rs. 50 in a cawk. Amah umnak siangbawi inn a sak. 1900 kum ah Hakha ah Primary Mission Sianginn a sak. 1900 kum ah Rev. Tilbe he Laica an remh. Khrihfa hla fung 34 a leh. Pathian thawngṭha a chim. March 25, 1907 kum ah Hakha ah Chin Hills Baptist Association a thawk.

Rev. Carson cu rilfonghlei zawtnak a ngei. Dr. East nih America ah kal law in hlai hna seh, a ti i America kal a fial. Rev. Carson nih, kalnak phaisa ka ngei lo, ka ṭha ko lai, a ti. A voi hnihnak Chin Hills Baptist Association civui cu March 1908 ah Khuasak ah an tuah. Laura he Khuasak civui ah cun an kal. Rev. Carson cu pumh uktu le tawlreltu bik a si tikah a re a thei, a tha a ba ngaingai. A bat tuk caah a rilfonghlei zawtnak a puang. A celh bak ti lo. Rev. Carson nih, “Ka hlai ko law, ka dam ko lai,” tiah Dr. East cu a ti chin cang. A celh bak ti lo i, a hrum hluahmah cang.

Zumtu thar hna nih Khuasak civui tuahnak cun laang in an zawnh i hlai ding cun Dr. East lei an panhpi. Laang in an zawnh pah zong ah Rev. Carson cu a celh tilo i, a thaisung dawt tukmi vancung thaizuar bang ai dawhmi samthlairem sin ah cun, “ka dawt Laura aw! Ka celh baklo ee ka thi ko lai” tiah a hmaisen turmar bu cun a von chimh. A dawt Laura caah ngaih har tukmi bia si. Laura cu a biangcung ah mitthli an hun i zul thliahmah cang. Cu bu cun, “ka dawt Carson aw, i hne ko mu. Bawipa nih an dawt ko. Na thi lai lo. Dr. East nih an hlai lai i na dam ko lai mu ka dawt i hne ko mu” tiah intuar a von fial ṭualmal. Carson nih cun, “ka dawt Laura aw! In khawh si tilo e ka thi ko lai” tiah a fah le fah lo cu a mithli hna nih bia an von chim cang. Laura nih, “Ka dawt Carson aw! na ka kaltak ahcun zeitindah hi minung hna sinah khua ka run sak kun lai ka dawt. Nang loin hi minung hna sinah khuasak ding cu a si khawh ṭung lai lo” tiah a mitthli he ik thliahmah in a hngawng ah a von kuh reh. Cu ti mitthli he an von i kuh-reh ah cun zumtu thar (Laang zawntu hna) hna zong an celh tilo i nguingui thlakthlak in an ṭap hna. An ik thliahmah hna. Bawipa aw, kan kaltak hrimhrim hlah mu. Kan in sianglo tiin an dihlak ngacha in an an chim lulh cio. Cu thawng nih Carson le Laura thin le lung cu mei chunh in a chunh hna i an mithli thlak a rang thluahmah cang. Tlawmpal ah Dr. East sin cu an von phan.

March 30, 1908 ah Dr. East nih cun a hlai. An hlai lio ah cun Laura le zumtu thar hna nihcun ruahchannak nganpi he thlacamnak in leng lei ah an rak hngak hna. A dang cu an ṭhu hna nain Laura tu cu a ṭhu kho ti loh. Innka hram bak ah a dir. A sam thlizil nih a von hranh. A hmaithlak rem dawh hna an hong sen. Thlacamnak he innka hram te ahcun a dawt Carson kong thawngthanh ding cu a hngak. Cu tlawmpal ah Dr. East cu a hong chuak. Laura nihcun leklak tiah a von zuan hnawh. Ka dawt Carson cu zeidah a lawh tiah ruahchannak lianpi he a von hal. Dr. East zong cu Carson kong von chimh ding ah ai harh tuk. A dang a khar. A mitbenh a von i phoih. A mithli a von i hnawh pah in Carson a nunnak a dih cang tiah a von chimh cu Laurau le zumtu hna cu zaantim uico ṭah bang an hluan. Carson a nunnak a liam hi April 01 1908 ah a si. Laura le bang cu a ṭah tuk ahhin a cekkha tiang chuak hnik an i zal. Rev. Dr. Tilbe nih, “Carson! Carson! Carson! Na liamsia herh tuk maw? na dawt thaisung le zumtu hna hi zeitindah an von um kun ne lai?. Na lohma tampi a taan rih ttung. Kan cim rih ttung lo. Hi ti ngai hin cun nehbung kan khirh ngam lai maw?” tiah a mithli he Carson ruak cu a von zai hnawh len. Mitthli he ṭah len zong ah zei san cu tlai ti hlah kaw Siangbawi ramkulh chung farhmawng tangah Rev. Carson ruak cu Rev. Dr. Tilbe nih a vui…..

Solo 1 nak. Leeng Mercy Ngun Tha Chin (Video)

Solo 2 nak. Leeng Rachel Ni Par Tha (Video)

Thawngṭha chim: Rev. Stephen Soe Paing (HBA AGS) (Video)

Pumhnak dihlak Video zoh na duh ahcun a tang ah. (Video)








Be the first to comment

Leave a Reply

Your email address will not be published.


*